ފޮޓޯ: ނިއުސްވަޔާ ލަންކާ
ސްރީ ލަންކާގެ ބަންޑާރަނައިކަ ބައިނަލްއަޤުވާމީ ވައިގެ ބަނދަރުން 1.1 ބިލިއަން ރުޕީސް އަށްވުރެ އަގު ބޮޑު މަސްތުވާތަކެތީގެ ޝިޕްމަންޓަކާއެކު 22 ބުޑިސްޓު ފާދިރީއަކު ހައްޔަރުކޮށްފައިވާ ކަމަށް ލަންކާގެ މީޑިއާތަކުން ރިޕޯޓުކޮށްފިއެވެ.
މި އޮޕަރޭޝަން ހިންގީ ހޮނިހިރު ދުވަހުގެ ރޭ، (ރޭގައި) ލަންކާ ފުލުހުންގެ ޕޮލިސް ނާކޮޓިކްސް ބިއުރޯ (ޕީއެންބީ) އިން ލިބުނު އިންޓެލިޖެންސް މަޢުލޫމާތެއްގެ މައްޗަށް ބިނާކޮށް ކުރި ރެއިޑެއްގައި ކަމަށް ނިއުސްވަޔަރ އިން ރިޕޯޓުކޮށްފައިވެއެވެ.
ނިއުސްވަޔަރ އިން ރިޕޯޓުކޮށްފައިވާ ގޮތުގައި، މި އޮޕަރޭޝަންގައި 110 ކިލޯއަށްވުރެ ގިނަ "ކުޝް" އާއި ހަޝިޝް ކަމަށް ޝައްކުކުރެވޭ މަސްތުވާތަކެތި އަތުލައިގެންފައިވެއެވެ. ފާދިރީންގެ ފޮށިތަކުގެ ދޮގު އަޑީގައި، ސްކޫލް ތަކެއްޗާއި ތަފާތު ވައްތަރުގެ ފޮނި ތަކެއްޗާއެކު މި މަސްތުވާތަކެތި ފޮރުވާފައި ހުރި ކަމަށް ފުލުހުން ބުނެއެވެ. އޭގެ ތެރޭގައި ކޮންމެ ފާދިރީއެއްގެ ފޮށީގައި ފަސް ކިލޯއަށްވުރެ ގިނަ މަސްތުވާތަކެތި ހުރި ކަމަށް ވެއެވެ.
ތަޙުޤީޤުން ހާމަވި ގޮތުގައި، މި ފާދިރީންގެ ގްރޫޕު ތައިލެންޑުގެ ވެރިރަށް ބެންކޮކަށް ދަތުރުކޮށްފައިވަނީ މި މަހުގެ 22 ވަނަ ދުވަހު، ސްޕޮންސަރަކު ހަމަޖައްސައިދިން ވައިގެ ޓިކެޓުތަކެއްގައެވެ. އަދި ފާދިރީންގެ މޯބައިލް ފޯނުތަކުން ފެނިފައިވަނީ، އެ މީހުން ބޭރުގައި ތިބި އިރު ޢާންމު ހެދުމުގައި ތިބި ފޮޓޯއާއި ވީޑިއޯތައް ކަމަށް ރިޕޯޓުތައް ބުނެއެވެ.
ނިއުސްވަޔަރ ބުނެފައިވާ ގޮތުގައި، ހައްޔަރުކުރި ފާދިރީންނަކީ ލަންކާގެ ތަފާތު ހިސާބުތަކުން ދިޔަ ޒުވާން ފާދިރީން ކަމަށާއި، އެ މީހުންނަކީ އެކި އެކި މުއައްސަސާތަކުން މަތީ ތަޢުލީމު ހާސިލުކުރަމުންދާ ފަރާތްތައް ކަމަށެވެ. މި ފާދިރީން ހުށަހެޅުމަށް ހަމަޖެހިފައިވަނީ ނެގޮމްބޯ މެޖިސްޓްރޭޓު ކޯޓަށެވެ.
ލަންކާގެ މީޑިއާތަކުގެ ރިޕޯޓުތައް ބުނާ ގޮތުގައި، މިއީ ބަންޑާރަނައިކަ ބައިނަލްއަޤުވާމީ ވައިގެ ބަނދަރުގެ ތާރީޚުގައި ހިފުނު އެންމެ ބޮޑު މަސްތުވާތަކެތީގެ މައްސަލަ ކަމަށާއި، އެ ވައިގެ ބަނދަރުން މިހާ ބޮޑު ޢަދަދެއްގެ މަސްތުވާތަކެއްޗާއެކު ފާދިރީން ހައްޔަރުކުރި މިއީ ފުރަތަމަ ފަހަރެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް