އެސްޑީއެފްގެ ހަނގުރާމަވެރީންތަކެއް - އޭޕީ ފޮޓޯ
ސޫރިޔާގެ ސަރުކާރާއި ސޫރިޔާގެ ސީރިއަން ޑިމޮކްރެޓިކް
ފޯސަސް (އެސްޑީއެފް) އާއި ދެމެދު މިހާރު ހިނގަމުން އަންނަ ކުރިމަތިލުމުގެ ތެރެއިން
އަނެއްކާވެސް ފުޅާ ދާއިރާއެއްގައި އިސްލާމިކް ސްޓޭޓް (އައިއެސް) އަލުން
ވުޖޫދުވެދާނެކަމުގެ ބިރު ހީވެއްޖެއެވެ.
ޖަނަވަރީ 13ގައި ފެށުނު ވަރުގަދަ
ކުރިމަތިލުންތަކަށްފަހު އެސްޑީއެފް އާއި ސަރުކާރުން އެއްބަސްވުމަކަށް ދިޔަނަމަވެސް
އެސްޑީއެފުން ގަސްތުގައި ބައެއް ޖަލުތަކުން އައިއެސްގެ މެންބަރުން ދޫކޮށްލާކަމުގެ
ތުހުމަތު ވަނީ ކޮށްފައެވެ.
2014 ވަނަ އަހަރުގައި އިސްލާމީ ޚިލާފަތެއް އިޢުލާނުކުރި
އައިއެސް ބަލިކޮށް ތުރުކީއާއި ސޫރިޔާގެ ޖަލުތަކުގައި އައިއެސްގެ އެތައް ބަޔަކު ގައިދުކުރެވުނެވެ.
ސޫރިޔާ ފަޅީގެ އެ ޖަލުތަކުގެ ތެރެއިން ގިނަ ޖަލުތަކެއް ކޮންޓްރޯލު ކުރަމުންދިޔައީ
އެސްޑީއެފްއިންނެވެ. ސޫރިޔާ ސަރުކާރުން ތުހުމަތުކުރާގޮތުގައި އެސްޑީއެފްއިން އައިއެސްގެ
ބައެއް މެންބަރުން އެފަދަ ގޮތަކަށް ދޫކުރަން ފެށީ ސިޔާސީ ގޮތުން ބަދަލު ހިފުމުގެ
ގޮތުންނެވެ.
ސޫރިޔާ މަސްރަޙުގެ ތާޒާ އަދާހަމަތަކަށް އަދި
ފަސްފަހަތަށް ކުރުކޮށް ބަލައިލާއިރު 2024ގެ ފަހުކޮޅުގައި ސޫރިޔާގެ ކުރީގެ ރައީސް
ބައްސާރުލް އަސަދުގެ ބާރު ކަނޑުވާލައި ވެރިކަމަށް އަހްމަދު އަލް-ޝަރާ ހަމަޖެހިގެން
ދިޔަ ނަމަވެސް ކުރުދީންގެ ތެރެއިން އެމެރިކާގެ ތާޢީދާއެކު އުފެދިފައި އޮތް އެސްޑީއެފުން
ދިޔައީ ސޫރިޔާގެ އިރު ދެކުނުގެ ބޮޑު ބައެއް ކޮންޓްރޯލު ކުރަމުންނެވެ. ދާޚިލީ ހަނގުރާމައިގެ
ތެރެއަށް ވަންނާކަށް އެސްޑީއެފުން ބޭނުމެއް ނުވިއެވެ.
ނަމަވެސް އެސްޑީއެފުން ކޮންޓްރޯލުކުރާ ރައްޤާ އާއި
ދެއިރް އެޒް-ޒޯސްގެ ސަރަހައްދުތަކަކީ ތެލުގެ ގޮތުން މުއްސަނދި ސަރަހައްދުތަކެކެވެ.
ޖަނަވަރީ 13ގައި ސޫރިޔާގެ ސަރުކާރުން އެސްޑީއެފް އާއި ދެކޮޅަށް ކުއްލި ވަރުގަދަ
ހަމަލަތަކެއް ދޭން ފެށީ ސޫރިޔާގެ ފުލް ކޮންޓްރޯލު ހޯދުމުގެ ބޭނުމުގައި ކަމަށް
ބުނެވިދާނެއެވެ. ފުލް ސްކޭލް ހަމަލަތަކަށްފަހު ބޮޑު ކޮންޓްރޯލެއް ސަރުކާރަށް ލިބި
މިހާރު ވަނީ ސުލްހައިގެ އެއްބަސްވުމެއް ގާއިމުކޮށްފައެވެ. ނަމަވެސް އެއްބަސްވުން
ދެމި އޮތުމާއިމެދު އަދި ވަނީ ސުވާލުތަކެއް އުފެދިފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް