ކޮބާ ހަފުތާ ބަންދު ނިމުނީނު ! އޮފީހަށް ނިކުމެ ފަށައިގަންނާން އުނދަގޫތަ !؟

ހުކުރު ހޮނިހިރުގެ އަރާމަށްފަހު އާދީއްތަ ދުވަހު އެލާމް އަޅާ އަޑަށް ހޭލެވޭއިރު، ތެދުވާ ހިތް ނުވެ އެނދުގައި ދެތިން މިނެޓު އިތުރަށް އޮށޯވެލާ ހިތްވުމަކީ ވަރަށް ގިނަ ދިވެހިންނަށް ދިމާވެދާނެ ހާލަތެކެވެ. ބަންދު ދެ ދުވަހު ބޭނުން ގޮތަކަށް ވަގުތު ހޭދަކުރުމަށްފަހު، ކުއްލިއަކަށް އޮފީހުގެ ޝެޑިއުލަށް ރުޖޫޢަވުމަކީ ހަށިގަނޑަށާއި ސިކުނޑިއަށް ވެސް ބުރައެކެވެ.

ހަފުތާ ބަންދަށްފަހު ފަށައިގަންނާން އެހާ އުނދަގުލީ ކީއްވެ ؟

މީގެ މައިގަނޑު އެއް ސަބަބަކީ ނިދުމުގެ ގަޑިތައް ބަދަލުވުމެވެ. ބަންދު ދުވަސްތަކުގައި ރޭގަނޑު ލަހުން ނިދައި، ހެނދުނު ލަހުން ހޭލައި އުޅުމުން، ހަށިގަނޑުގެ ބައޮލޮޖިކަލް ގަޑި އޮޅުންބޮޅުންވެއެވެ. ނަތީޖާއެއްގެ ގޮތުން އާދީއްތަ ދުވަހު ފަތިހު ހޭލާއިރު ހުންނަ ވަރުބަލިކަމަކީ ހަމައެކަނި ކަންނެތްކަމެއް ނޫނެވެ. އެއީ ހަށިގަނޑު އަލުން ތާވަލަށް ހޭނެން ކުރާ މަސައްކަތެވެ. މީގެ އިތުރުން، ބަންދު ދުވަސްތަކުގައި ފޯނާ ކުޅެ، ސީރީޒްތައް ބަލައި، ސިކުނޑި "ފްރީ މޯޑް" ގައި ހޭދަކުރުމަށްފަހު، ކުއްލިއަކަށް ޓާސްކްތަކާއި ޑެޑްލައިންތަކާ ކުރިމަތިލާން ޖެހުމުން ސިކުނޑިއަށް ބާރުބޮޑުވެދާނެތީ ފަހަތަށް ޖައްސާލަން ބޭނުންވެއެވެ.

ހޮނިހިރު ދުވަހުގެ ރޭ ތައްޔާރުވެވިދާނެތަ؟

ހޮނިހިރު ދުވަހުގެ ރޭ ކުޑަ ތައްޔާރީއެއް ވެލުމުން އާދީއްތަ ދުވަހުގެ ފެށުން މާ ބޮޑަށް ފަސޭހަވެއެވެ. އެންމެ ފުރަތަމަ ކަމަކީ ނިދާ ގަޑި ހޮނިހިރު ދުވަހުގެ ރެއިން ފެށިގެން ރަނގަޅު ކޮށްލުމެވެ. ބަންދުގައި މެންދަމު އެކެއް ޖަހާއިރު ނިދި ނަމަވެސް، ހޮނިހިރު ދުވަހުގެ ރޭ ދިހައެއް ޖަހާކަށް ހާއިރު ނިދަން އޮށޯތީމާ ހެނދުނު ހޭލެވޭއިރު ހަށިގަނޑު މާ ތާޒާވާނެއެވެ. ހަމައެއާއެކު، ޖެހިގެން އަންނަ ދުވަހު ލާނެ އެއްޗެހި ތައްޔާރުކޮށް، ގެންދަންޖެހޭ ސާމާނު ދަބަހަށް ލައި ބެހެއްޓީމާ ހެނދުނުގެ ހާސްކަން ކުޑަވެއެވެ.

ހެނދުނު ފެށުން ރަނގަޅު ކުރާނީ ކިހިނެއް؟

ހެނދުނު ހޭލައިގެން ފުރަތަމަ ކަމަކަށް ފޯނު ނެގުމުގެ ބަދަލުގައި، ތެދުވެ މޫނު ދޮވެ ފެންފޮދެއް ބޯލުމުން ހަށިގަނޑު ހޭލައްވާލެވެއެވެ. ސައިގައި ވެސް ބަރު ކެއުމެއްގެ ބަދަލުގައި ލުއި ކެއުމެއް ނެގީމާ ބަނޑު ބަރުނުވެ ހެނދުނުގެ ފުރަތަމަ ގަޑިތައް މާ ހަކަތައިގައި ހޭދަކުރެވެއެވެ. ރޮށްޓާއި ބިހާއެކު ދޮންކެޔޮ ވަކެއް، ނޫނީ ޖޫސް ތައްޓެއް ފުދެއެވެ. އޮފީހަށް ދާ މަގުމަތީ ނުވަތަ ލޯންޗުގައި ވެސް، ކުރާނެ މަސައްކަތްތައް ސިކުނޑީގައި ތަރުތީބުކޮށްލީމާ ގޮނޑީގައި އިށީންނައިރު ސީދާ ފެށޭ ގޮތް ވެއެވެ.

ކޮންމެ ހަފުތާއަކު މި ވާހަކަ ތަކުރާރުވާނަމަ ދެން ހަދާނީ ކިހިނެއް؟

ކޮންމެ އާދީއްތައެއް ހަނގުރާމައަކަށް ވާ ނަމަ، ބަންދު ދުވަސްތައް ހޭދަކުރާ ގޮތް ވެސް ކުޑަކޮށް ބަދަލުކޮށްލުން ރަނގަޅެވެ. ބަންދުގައި މުޅިން ހެނދުނު ލަހަށް ނިދުމުގެ ބަދަލުގައި، އޮފީސް ދުވަސްތަކުގެ ގަޑިއާ މާ ބޮޑަށް ތަފާތު ނުވާ ގޮތަށް ނިދީމާ ހަށިގަނޑުގެ ގަޑި ހަމައެއް ނުކެނޑެއެވެ. ހޮނިހިރު ދުވަހު ހެނދުނު ގެއިން ބޭރަށް ނިކުމެ ހިނގާލައި، ދުވާލުގެ އަލި ހަށިގަނޑަށް ލިބޭ ގޮތް ހެދީމާ ވެސް ރޭގަނޑު ނިދި އަވަސްވެ، ނިދީގެ ސައިކަލް ރަނގަޅުވެއެވެ. ހަނދާން ކުރާށެވެ، އާދީއްތަ ދުވަހަކީ ދުޝްމަނެއް ނޫނެވެ. ކުޑަކުޑަ ތައްޔާރީއަކުން އެ ދުވަސް ވެސް ފެށުން ރަނގަޅު ދުވަހަކަށް ހެދެއެވެ.