ކެރެލާ ނިޕާ ކޭސް ޕޫނޭ ލެބުން ކަށަވަރުކޮށްފި - 77 ކޮންޓެކްޓް ފާހަގަކޮށްފި

ކެރަލާގެ ކޮޒިކޯޑުން ފެނުނު ނިޕާ ވައިރަސްގެ ކޭސް ޕޫނޭގެ ނޭޝަނަލް އިންސްޓިޓިއުޓް އޮފް ވައިރޮލޮޖީ (އެންއައިވީ) އިން ބުރާސްފަތި ދުވަހު ކަށަވަރުކޮށްފިއެވެ.

ބަލިމީހާގެ ހާލު ސީރިއަސް ކަމަށާއި ވެންޓިލޭޓަރ ސަޕޯޓުގައި ފަރުވާ ދެމުންދާ ކަމަށް ކޮޒިކޯޑު ސަރުކާރު މެޑިކަލް ކޮލެޖުން ބުންޏެވެ.

ކޮލެޖުގެ ލެބޯޓަރީން ބުދަ ދުވަހު ހެދި ފުރަތަމަ ތަހްލީލުތަކުން ނިޕާ ވައިރަސް ހުރި ކަމަށް ދެއްކުމާ އެކު، ކަށަވަރުކުރުމަށް ޕޫނޭއަށް ސާމްޕަލް ފޮނުވީއެވެ. ޕޫނޭ ލެބުގެ ނަތީޖާ އިން ވެސް ނިޕާ ޕޮޒިޓިވް ކަން ޔަގީންވީއެވެ. ފަރޫކު ސަރަހައްދުގައި ދިރިއުޅޭ 43 އަހަރުގެ މި ފިރިހެންމީހާ ދާދިފަހުން ގުދަނެއް ކުއްޔަށް ހިފައި އަމިއްލައަށް ސާފުކުރި ކަމަށާއި، ވާލު އުޅޭ ކަމަށް ޝައްކުކުރެވޭ އެ ތަނުން ވައިރަސް ޖެހުނީ ކަމަށް ބެލެވޭ ކަމަށް ސިއްހީ އިދާރާތަކުން ބުންޏެވެ.

ކޮޒިކޯޑު ޑިސްޓްރިކްޓް ހެލްތު ޑިޕާޓްމަންޓުން ވަނީ ބަލިމީހާގެ ކޮންޓެކްޓުންގެ ގޮތުގައި 77 މީހުން ފާހަގަކޮށްފައެވެ. އޭގެ ތެރެއިން ދެ މީހުން ވަނީ އެންމެ ނުރައްކާ ބޮޑު ކެޓެގަރީގައި ހިމަނާފައެވެ. ބަލިމީހާ ފުރަތަމަ ހުމެއް އައިސް ރަނގަޅުވި ފަހުން އަލުން ހާލު ދެރަވެ، ތަކުރާރުކޮށް ހޮސްޕިޓަލްތަކަށް ދިޔަ ތެރޭ ގިނަ ބަޔަކާ ކޮންޓެކްޓްވީއެވެ. ހެލްތު ޑިޕާޓްމަންޓުން ވަނީ ބަލިމީހާ ދަތުރުކުރި ތަންތަން ދެނެގަތުމަށް ތަފްސީލީ ރޫޓް މެޕެއް ތައްޔާރުކޮށްފައެވެ.

ހެލްތު މިނިސްޓަރު ކޭ. މުރަލީދަރަން ބުރާސްފަތި ދުވަހު ބޭއްވި މަތީ ފެންވަރުގެ ބައްދަލުވުމަށް ފަހު ބުނީ ހާލަތު ކޮންޓްރޯލުގައި ވާ ކަމަށާއި ރައްޔިތުން ބިރުގަންނަން ޖެހޭ ކަމެއް ނެތް ކަމަށެވެ. ކޮޒިކޯޑު މެޑިކަލް ކޮލެޖުގެ ޕޭ ވޯޑު ސަރަހައްދު ބަންދުކޮށް، ބަލިމީހާއާ ކޮންޓެކްޓްވި ހޮސްޕިޓަލް މުވައްޒަފުންނާއި އާއިލާ މެންބަރުން ކަރަންޓީނަށް ގެންގޮސްފައިވެއެވެ.

ކެރަލާ އަކީ 2018، 2021، 2023 އަދި 2024 ގައި ވެސް ނިޕާ ފެތުރިގެން ދިޔަ ސްޓޭޓެކެވެ. 2018 ވަނަ އަހަރު ކޮޒިކޯޑުގައި ފެތުރުނު ނިޕާ ރާޅުގައި 17 މީހުން މަރުވިއެވެ.