N/A
ފ. ފީއަލީ ބަނދަރުމަތީގައި އިއްޔެ ހެނދުނު ހިނގި ނުރައްކާތެރި އަލިފާނުގެ ހާދިސާގައި ބޮޑަށް ފިހުނު ބަންގްލަދޭޝް މީހާ މާލެ ގެނެސް، އައިޖީއެމްއެޗްގެ ވެންޓިލޭޓަރުގައި އޭނާއަށް މިހާރު ދަނީ ފަރުވާ ދެމުންނެވެ.
އިއްޔެ ހެނދުނު 9:15 އެހާކަންހާއިރު މި ހާދިސާ ހިނގާފައިވަނީ ފީއަލީ ބަނދަރުގައި އޮތް ތެޔޮ އުފުލާ އުޅަނދެއްގައެވެ. މި ހާދިސާގައި އަނިޔާވި އުމުރުން 39 އަހަރުގެ ބަންގްލަދޭޝް ފިރިހެން މީހާގެ ހަށިގަނޑުގެ 60 އިންސައްތަ ފިހިފައިވާ ކަމަށް އައިޖީއެމްއެޗުން މައުލޫމާތު ދެއެވެ. އޭނާގެ ހާލު ސީރިއަސްވުމުގެ ސަބަބުން، ފީއަލީ ސިއްހީ މަރުކަޒުން ފުރަތަމަ ފަރުވާ ދިނުމަށްފަހު އިތުރު ފަރުވާއަށް މާލެ ބަދަލުކުރީއެވެ.
އެމްއެންޑީއެފްގެ ނިލަންދޫ ފަޔާ ސްޓޭޝަނަށް މި ހާދިސާގެ މައުލޫމާތު ލިބުނީ ހެނދުނު 9:30 ހާއިރުއެވެ. އަލިފާން ނިއްވުމުގެ މަސައްކަތުގައި ނިލަންދޫ އަދި ކުޑަހުވަދޫ ފަޔާ ސްޓޭޝަންގެ ސިފައިން ހަރަކާތްތެރިވިއިރު، ގަޑިއިރެއްހާއިރުގެ މަސައްކަތުން އަލިފާންގަނޑު އެއްކޮށް ކޮންޓްރޯލް ކުރެވުނީ ހެނދުނު 10:35 ހާއިރުއެވެ.
މި ހާދިސާގައި ތެޔޮ ދޯނީގެ އިތުރުން ކައިރީގައި އޮތް އިތުރު ތިން ދޯންޏަކަށް އަލިފާން ފެތުރި، ޖުމްލަ ހަތަރު އުޅަނދެއް ވަނީ ބޭނުން ނުކުރެވޭ ވަރަށް އަނދާފައެވެ. މީގެ އިތުރުން، އެ ސަރަހައްދުގައި ހުރި އައިސް ޕްލާންޓަށް ވެސް ބޮޑެތި ގެއްލުންތަކެއް ލިބިފައިވެއެވެ.
ފީއަލީ ކައުންސިލުން މައުލޫމާތު ދޭ ގޮތުގައި، މި ހާދިސާގެ ސަބަބުން ލިބުނު މާލީ ގެއްލުން 20 މިލިއަން ރުފިޔާއަށް ވުރެ ބޮޑުވާނެ ކަމަށް ލަފާކުރެވެއެވެ. މިއީ ފަހުގެ ތާރީޚެއްގައި އެ ރަށުގައި ހިނގި އެންމެ ބޮޑު އަދި އެންމެ ނުރައްކާތެރި އަލިފާނުގެ ހާދިސާއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް