ރައީސުލްޖުމްހޫރިއްޔާ ރިޔާސީ ބަޔާން އިއްވުން - ފޮޓޯ: ރައްޔިތުންގެ މަޖިލިސް
ހުޅުމާލޭ ގްރޭންޑް މިސްކިތުގެ އަމަލީ މަސައްކަތް މި
އަހަރު ފެށޭނެކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
ވިދާޅުވެއްޖެއެވެ.
ރައީސް މިހެން ވިދާޅުވީ ރައްޔިތުންގެ މަޖިލީހުގައި
ރައީސް އިއްވި ރިޔާސީ ބަޔާނުގައެވެ.
ރިޔާސީ ބަޔާނުގައި މިސްކިތްތަކާއި ބެހޭގޮތުން
ވާހަކަފުޅު ދައްކަވަމުން ރައީސް ވިދާޅުވީ ނިމިދިޔަ 2025 ވަނަ އަހަރު 74 މިސްކިތާއި
ހަތް އިސްލާމީ މަރުކަޒާއި ތިން ޤުރްޢާން މަރުކަޒާއި ހަ ވަގުފް ބިނާއާއެކު މުޅިއެކު
90 މަޝްރޫޢެއްގެ ޢަމަލީ މަސައްކަތް ކުރިއަށްގެންދެވުނު ކަމަށެވެ.
"ދިއްދޫ އިސްލާމިކް ސެންޓަރާ 10 ރަށެއްގެ މަސައްކަތް
ނިންމި ހުޅުވިން، ރަމަޟާން މަސް ފެށުމުގެ ކުރިން 8 މިސްކިތެއް ހުޅުވާނަން"
ރައީސް ވިދާޅުވިއެވެ.
ބޭނުންވާ މިސްކިތްތައް މަރާމާތު ކުރުމަށްވެސް މި
ސަރުކާރުން އިސްކަންދޭކަން ފާހަގަކުރައްވަމުން ރައީސް ވިދާޅުވީ ނިމިދިޔަ އަހަރު
19.4 މިލިޔަން ރުފިޔާ ރާއްޖޭގެ އެކި ރަށްރަށުގައި މިސްކިތްތައް މަރާމާތުކުރުމަށް
ހޭދަކުރެވުނު ކަމަށާއި އަދި މި އަހަރު 15 މިލިޔަން ރުފިޔާ މިސްކިތްތައް މަރާމާތު
ކުރުމަށް ހަމަޖައްސާފައިވާނެ ކަމަށެވެ.
މިއަހަރު ބަޖެޓުން ރާއްޖޭގެ އިތުރު 10 ރަށެއްގައި
އިސްލާމީ މަރުކަޒު ބިނާކުރުމުގެ މަސައްކަތް ފެށޭނެކަން ފާހަގަކުރެއްވިއެވެ. އެގޮތުން
ތިން މަރުކަޒެއްގެ އެއްބަސްވުމުގައި ޖަނަވަރީ 21 ވަނަ ދުވަހު ސޮއި ކުރެވުނުކަން
ފާހަގަކުރައްވައި މި އަހަރު އިތުރު 17 ރަށެއްގަ މިސްކިތް އެޅުމުގެ މަސައްކަތް
ފެށޭނެ ކަން ހާމަކުރެއްވިއެވެ.
މީގެ އިތުރުން މިސްކިތުގެ މައި ހޯލުގައި 800 އަށްވުރެ
ގިނައިން ނަމާދުކުރެވޭ މިސްކިތްތަކުގެ މައި ހޯލާ އަންހެނުންގެ ނަމާދުކުރާ ބައި
އޭސީ ކުރުމަށް ސަރުކާރުން ފެއްޓެވި މަސްރޫޢުގެ ދަށުން މާލޭގަ ހުރި ހަތަރު
މިސްކިތެއްގެ މައި ހޯލާ އަންހެނުން ނަމާދުކުރާ ބައި މި ބަރަކާތްތެރި ރަމަޟާން މަސް
ފެށުމުގެކުރިން އޭސީ ކުރެވޭނެކަންވެސް ރައީސް ފާހަގަކުރެއްވިއެވެ.
ރައީސްގެ ރިޔާސީ ބަޔާނުގައި ހުޅުމާލޭ ގްރޭންޑް މިސްކިތެއްގެ
ތަސައްވުރުގެ ވާހަކަ ފާހަގަކުރެއްވިއިރު ހުޅުމާލޭ ގްރޭންޑް މިސްކިތުގެ ގޮތުގައި
މިހާރު ކިޔަނީ މަސްޖިދު އަލް ޝައިޚް ޤާސިމް ބިން އަލް-ޠާނީ މިސްކިތަށެވެ. އެހެން
ނަމަވެސް އާ ތަސައްވުރެއްގެ ވާހަކަފުޅުކަމުން އެއީ ހުޅުމާލޭގައި ބޮޑު އާ
މިސްކިތެއް ބިނާކުރެއްވުންކަމުގައި ބެލެވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް