ޠާރިޤާއި އާދަމް ޝަރީފް ސަފީރުކަމަށް އައްޔަންކުރަން ކޮމިޓީން ރުހުންދީފި

ކުރީގެ ދެ ވަޒީރުން ކަމަށްވާ ޠާރިޤް އިބްރާހީމާއި އާދަމް ޝަރީފް އުމަރު ސަފީރުކަމަށް އައްޔަންކުރުމަށް، ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން މިއަދު ރުހުންދީފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުށަހެޅުއްވި ގޮތުގެ މަތިން، އެކުވެރި ޢަރަބި އިމާރާތް (ޔޫއޭއީ) އަށް ކަނޑައަޅުއްވާ ސަފީރަކަށް ޠާރިޤް އިބްރާހީމް، އަދި ޤަތަރަށް ކަނޑައަޅުއްވާ ސަފީރަކަށް އާދަމް ޝަރީފް އުމަރު އައްޔަންކުރުމަށް ކޮމިޓީން ވަނީ ނިންމާފައެވެ. މި ދެ ބޭފުޅުންގެ ނަން މަޖިލީހަށް ހުށަހެޅުއްވީ ރައީސް މުޢިއްޒެވެ.

ޚާރިޖީ ގުޅުންތަކުގެ ކޮމިޓީން މިއަދު ބޭއްވި ބައްދަލުވުމުގައި ކުޅުދުއްފުށި އުތުރު ދާއިރާގެ މެންބަރު މުޙައްމަދު ދާއޫދު ފާހަގަކުރެއްވީ، މި ދެ ބޭފުޅުންނަކީ ތަޢުލީމީ ގޮތުންނާއި ތަޖުރިބާގެ ގޮތުން ބަލާއިރު ވަރަށް ޤާބިލު ދެ ބޭފުޅުން ކަމަށެވެ. އެހެންކަމުން، އިތުރު އިންޓަވިއުއަކާ ނުލައި ދެ ބޭފުޅުންނަށް ރުހުން ދިނުމަށް އޭނާ ހުށަހެޅުއްވިއެވެ.

މި ހުށަހެޅުމަށް ކޮމިޓީގެ އެހެން މެންބަރުން ތާޢީދުކުރެއްވުމާއެކު، ބައްދަލުވުމުގައި ބައިވެރިވެވަޑައިގެންނެވި 6 މެންބަރުންގެ އިއްތިފާޤުން ވަނީ ދެ ބޭފުޅުންނަށް ރުހުން ދިނުމަށް ފާސްކޮށްފައެވެ.

ޠާރިޤް އިބްރާހީމަކީ، މި ސަރުކާރުގެ މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރުކަން ކުރައްވާފައިވާ ބޭފުޅެކެވެ. މީގެ އިތުރުން ކުރީގެ ސަރުކާރުތަކުގައި ވެސް ވަޒީރުކަމާއި ސަރުކާރުގެ އިސް މަޤާމުތައް އޭނާ ފުރުއްވާފައިވެއެވެ. ޤަތަރުގެ ސަފީރުކަމަށް ރުހުން ދިން އާދަމް ޝަރީފް އުމަރަކީ، މި ސަރުކާރުގައި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރުކަން ކުރައްވާފައިވާ ބޭފުޅެކެވެ. އޭނާއަކީ ވެސް ކުރީގެ ސަރުކާރުތަކުގައި ވަޒީރުކަން ކުރައްވާފައިވާ، އަދި މިހާރު ވެސް ޚާރިޖީ ވުޒާރާގެ އިސް މަޤާމެއް ފުރުއްވަމުންދާ ތަޖުރިބާކާރު ބޭފުޅެކެވެ.

ކޮމިޓީން ދެ ބޭފުޅުންނަށް ރުހުން ދިނުމަށް ނިންމި ރިޕޯޓު ދެން ހުށަހަޅާނީ މަޖިލީހުގެ ތަޅުމަށެވެ. ތަޅުމުގައި މި ރިޕޯޓަށް ބަހުސްކޮށް ފާސްކުރުމުން، މަޖިލީހުގެ ޤާނޫނުގެ ދަށުން ސަފީރުކަމުގެ މަޤާމަށް ދެ ބޭފުޅުން ރަސްމީކޮށް އައްޔަންކުރެވޭނެއެވެ.