ސެމްސަންގް ގެލެކްސީ ނޯޓް 7 ފޯނު ގޮވާ މައްސަލައަށް ހައްލެއް ނުލިބި އެތައް ހާދިސާއެއް ހިނގަމުން އަންނައިރު ނޯޓް 7 ވިއްކުން ހުއްޓާލުމަށް ސެމްސަންގް ކުންފުނިން އަންގައިފި އެވެ.
އެ ކުންފުނިން މި އެންގުން އަންގާފައިވަނީ އެ ކުންފުނިން ނެރެފައިވާ ރަސްމީ ބަޔާނެއްގަ އެވެ.
އެ ބަޔާނުގައި ބުނެފައިވަނީ ސެމްސަންގް ނޯޓް 7 ބްރޭންޑްގެ ފޯނުތައް ގޮވާ މައްސަލަ ފެންމަތިވެ އެ މައްސަލަ ތަހުގީގު ކުރެވެމުންދާހިނދު ނޯޓް 7 ވިއްކުމާއި އެކްސްޗޭންޖް ކުރުން ހުއްޓާލުމަށް ކެރިއަރުންނަށާއި ރީޓެއިލް ޕާޓްނަރުންނަށް އަންގާ ކަމަށެވެ. އަދި އެ ކުންފުނިން އަބަދުވެސް އެއްމެ އިސްކަމެއް ދޭނީ ކަސްޓަމަރުންގެ ސަލާމަތާއި ރައްކާތެރި ކަމަށް ކަމުގައިވެސް ސެމްސަންގް ކުންފުނީގެ އެ ބަޔާނުގައި ވެ އެވެ.
