މިނިވަން ނޫހުގެ ނޫސްވެރިާ އަހުމަދު ރިލްވާން ގެއްލިގެން ހޯދުމަށް ފުލުހުން ކުރަމުންދާ މަސައްކަތް މަޑު ޖައްސާލުމާއި ގުޅޭ އެއްވެސް މެސެޖެއް ރައިސް އަބްދުﷲ ޔާމީން ނުކުރައްވާ ކަމަށް ކުރީގެ ހޯމް މިނިސްޓަރު އުމަރު ވިދާޅުވެއްޖެ އެވެ.
އަލްޖަޒީރާއިން ރާއްޖޭގެ ކޮރަޕްޝަނާއި ގުޅޭގޮތުން އާންމުކޮށްފައިވާ ޑޮކިއުމެންޓްރީގައި ބުނެފައިވަނީ އޭނާ ގެއްލުނު ދުވަސްވަރު ރިލްވާންގެ މައްސަލަ އެހާ ބާރުމިނުގައި ކުރިޔަށް ނުގެންދިއުމަށް ރައިސް ޔާމީން ހޯމް މިނިސްޓަރު ކަމުގައި އޭރު ހުންނެވި އުމަރު ނަސީރަށް މެސެޖެއް ކުރެއްވި ކަމަށެވެ. އަދި އޭގެ ޖަވާބުގައި އުމަރު ”އޯކޭ ނޯޓެޑް ސާރ“ މިހެން ޖެހުމަށް ފަހު މެސެޖެއް ކުރެއްވި ކަމަށެވެ.
ރައީސް ޔާމީން އެ މެސެޖު ކުރެއްވި ކަމަށް އަލްޖަޒީރާއިން ބުނެފައިވަނީ 2014 އޯގަސްޓް 22، ވަނަ ދުވަހުގެ ހަވީރު 05:25 ގައި އެވެ. އަދި އުމަރު ޖަވާބު ފޮނުއްވާފައިވަނީ ހަމަ އެދުވަހުގެ ރޭ 07:12 ގައި ކަމަށެވެ.
ނަމަވެސް އެ ޑޮކިއުމެންޓްރީ ބެއްލެވުމަށް ފަހު އުމަރު ކުރެއްވި ޓުވީޓެއްގައި ވިދާޅުވެފައިވަނީ އެއީ ދޮގެއް ކަަމަށާއި އެފަދަ މެސެޖެއް ރައީސް ޔާމީންގެ ފަރާތްޕުޅުން ލިބިވަޑައިގެންފައި ނުވާ ކަމަށެވެ.
I did not recieve any text message from RY on Rilwan's case. I am 100% sure that aljazeera will NOT have such a text.
— Umar Naseer (@UmarNaseerMV) September 7, 2016
ރިޕޯޓުގައި ބުނެފައިވާ ފަދައިން މި ސަރުކާރުކީ އެންމެ ކޮރަޕްޓް ސަރުކާރު ކަމަށް އުމަރުގެ އެހެން ޓުވީޓެއްގައި ވިދާޅުވެފައި ވެ އެވެ. އަދި ވިދާޅުވެފައިވަނީ މި ސަރުކާރާއި އެއްވަރަށް ކުރީގެ ރައީސް މުހައްމަދު ނަޝީދުގެ ސަރުކާރަކީވެސް ކޮރަޕްޓް ސަރުކާރެއް ކަމަށެވެ.
No doubt that this is the most corrupt govt ever, but equally corrupt was RNs' govt. Small difference between cholera and shygella.
— Umar Naseer (@UmarNaseerMV) September 7, 2016
ރާއްޖެއާއި ގުޅޭގޮތުން އަލްޖަޒީރާއިން ތައްޔާރު ކުރި އެ ޑޮކިއުމެންޓްރީގައި ސަރުކާރަށް ވަރަށް ބޮޑަށް ފާޑުކިޔާ ކޮރަޕްޝަންގެ ތުހުމަތު ކޮށްފައިވާއިރު މިހާރު އެ ޑޮކިއުމެންޓްރީ ވަނީ އަލްޖަޒީރާގެ ޔޫޓިއުބު ޗެނަލުގައި އާންމުކޮށްފައި އެވެ. ނަމަވެސް މިހާތަނަށް ސަރުކާރުން އެ ޑޮކިއުމެންޓްރީ އާއި ގުޅޭގޮތުން ރަސްމީކޮށް އެއްޗެއް ނުބުނެ އެވެ.
