އިސްރާއީލާއި އިރާނުގެ ހަނގުރާމަ އިތުރަށް ގޯސްވަމުންދާ މި ނާޒުކު ދަނޑިވަޅުގައި، އެމެރިކާއިން ވަނީ މެދުއިރުމަތީގެ ސަރަޙައްދަށް އިތުރު މަތިންދާބޯޓު އުފުލާ މަނަވަރެއް ފޮނުވުމަށް ނިންމާފައެވެ. މިގޮތުން، ޔޫއެސްއެސް ޖެރަލްޑް އާރް. ފޯޑް ނަމަކަށް ކިޔާ މަތިންދާބޯޓު އުފުލާ މަނަވަރު އެ ސަރަޙައްދާ ކައިރިއަށް ފޮނުވުމަށް ވަނީ ނިންމާފައެވެ.
މި ނިންމުން ނިންމާފައިވަނީ ރައީސް ޑޮނަލްޑް ޓްރަމްޕް، އިރާނާ ދެކޮޅަށް އިސްރާއީލުން ފަށާފައިވާ ހަނގުރާމައިގައި ބައިވެރިވުމަށް ވިސްނަމުންދާ ދަނޑިވަޅެއްގައެވެ. އެމެރިކާގެ ކަނޑުގެ ބާރުގެ އިސް އޮފިޝަލެއް މަޢުލޫމާތު ދެއްވާފައިވާ ގޮތުގައި، ޖެރަލްޑް އާރް. ފޯޑް އުޅަނދު 24 ޖޫން ގައި ވާރޖީނިއާގެ ނޯފޯކުން ފުރައިގެން ޔޫރަޕަށް ދަތުރުކުރުމަށް ހަމަޖެހިފައިވެއެވެ. މި ދަތުރުގައި އެ އުޅަނދު ހަރަކާތްތެރިވާނީ މެދުއިރުމަތީގެ ސަރަޙައްދާ ވަރަށް ކައިރިންނެވެ.
މި އުޅަނދު ބައިވެރިވާނީ މިހާރުވެސް އެ ސަރަޙައްދުގައި ހަރަކާތްތެރިވަމުންދާ އެމެރިކާގެ އިތުރު ދެ މަތިންދާބޯޓު އުފުލާ މަނަވަރާއެވެ. އެއީ:
- ޔޫއެސްއެސް ކާލް ވިންސަން: މި އުޅަނދު ދަނީ ޔަމަނުގައި އިރާނުގެ އެހީތެރިކަން ލިބިގެން ހަރަކާތްތެރިވާ ހޫތީންނާ ދެކޮޅަށް ދޭ ވައިގެ ހަމަލާތަކުގައި އެހީތެރިކަން ފޯރުކޮށްދެމުންނެވެ.
- ޔޫއެސްއެސް ނިމިޓްޒް: މި އުޅަނދު ވަނީ މެދުއިތުއްޗަށް ޖައްސާފައެވެ. އެއީ އެސަރަހައްދުގައި އެމެރިކާގެ އަޝްކަރީ ބާރު އިތުރުކޮށް، އެމެރިކާގެ ސިފައިން ރައްކާތެރިކުރުމަށްޓަކައެވެ.
މި ނިންމުން ނިންމާފައިވަނީ ފަހަކަށް އައިސް ދެމުންގެންދާ ހަމަލާތަކާއި ގުޅިގެންނެވެ. އިސްރާއީލުން ވަނީ އިރާނުގެ ނިއުކްލިއަރ އަދި ސިފައިންގެ އަމާޒުތަކަށް އެތައް ވައިގެ ހަމަލާތަކެއް ދީފައެވެ. ރައީސް ޓްރަމްޕް ބުނެފައިވާ ގޮތުގައި މި ހަމަލާތަކުގައި އެމެރިކާ ބައިވެރިވާނެތޯ ނުވަތަ ނޫންތޯ ދެ ހަފްތާގެ ތެރޭގައި ނިންމާނެ ކަމަށެވެ.
އެމެރިކާއިން ވަނީ އިރާނުގެ ފޯޑޯ ފެސިލިޓީ ފަދަ ބިމުގެ އަޑީގައިވާ ނިއުކްލިއަރ މަރުކަޒުކަށް ހަމަލާދެވޭނެ ބާރުގަދަ ”ބަންކަރ ބަސްޓަރ“ ބޮންތައް ޚާއްޞަ ގޮތެއްގައި ތައްޔާރުކޮށްފައެވެ.
މި ހަނގުރާމަ ވަނީ ވަރަށް ނާޒުކު ހިސާބެއްގައެވެ. ބައިނަލްއަޤްވާމީ ލީޑަރުން ވަނީ މި ހަމަލާތައް އިތުރަށް ގޯސްވެއްޖެނަމަ މުޅި ސަރަޙައްދުގައި ފުޅާ ދާއިރާއެއްގައި ހަނގުރާމައެއް ފެށިދާނެކަމަށް އިންޒާރުދީފައެވެ.
