ވައިޓްވައިން ބޭނުންކޮށްގެން އުފައްދާފައިވާ ސޯސް ފުޅިތަކެއް މާލޭގައި ވިއްކަމުން ދަނިކޮށް އަތުލައިގެންފައިވާކަމަށް ކަސްޓަމްސް އިން ބުނެފި އެވެ.
ކަސްޓަމްސް އިން ބުނީ ވައިޓް ވައިން ބޭނުންކޮށްގެން އުފައްދާފައިވާ ސޯސް ފުޅިތަކެއް މާލޭގެ ފިހާރައަކުން ވިއްކަމުން ގެންދާކަމަށް ލިބުނު މައުލޫމާތަކާއި ގުޅިގެން ކަސްޓަމްސް އިން ހިންގި ހާއްސަ އޮޕަރޭޝަނެއްގައި، ފާހަގަކުރެވުނު ހުރިހާ ފުޅިތަކެއް ހިފަހައްޓައި ކަސްޓަމްސްގެ ބެލުމުގެ ދަށަށް ގެންގޮސްފައިވާކަމަށެވެ.
”ގާނޫނީ ގޮތުން ރާއްޖެއަށް އެތެރެކުރުން މަނާ ތަކެތި އެތެރެކޮށް ވިއްކަން ހުންނަކަމަށް ކަސްޓަމްސްއަށް ފާހަގަކުރެވިއްޖެ ނަމަ، އެ ތަކެތި ހިފަހައްތައި ކަސްޓަމްސްގެ ބެލުމުގެ ދަށަށް ގެންދެވޭނެ“ ކަސްޓަމްސް އިން ބުނެ އެވެ.
ކަސްޓަމްސް އިން އިތުރަށްބުނީ މިފަދަ އެއްވެސް އެއްޗެއް ވިއްކަން ނުވަތަ އެނޫންގޮތަކަށްވެސް ރާއްޖޭގައި ގެންގުޅޭކަމަށް ފާހަގަކުރެއްވޭނަމަ ކަސްޓަމްސްގެ ހިލޭ ގުޅޭ ނަމްބަރު 1416 އަށް ގުޅުއްވާ އެ މައުލޫމާތު ހިއްސާކުރެއްވުމަށް އެންމެހާ ލޮބުވެތި ރައްޔިތުންނަށް އިލްތިމާސްކުރާ ކަމަށެވެ.
