ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އަރިހަށް، އެމެރިކާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު މިޝެލް ޖޭ. ސިސޯން ވަދާޢީ ޒިޔާރަތް ކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ހެނދުނު އޮތް މިބައްދަލުކުރެއްވުމުގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އެމެރިކާއިން ރާއްޖެއަށް ކަނޑައެޅުއްވި ސަފީރުކަމުގެ މަޤާމުގައި ހުންނަވައިގެން، ރާއްޖެއަށް އެކިގޮތްގޮތުން ދެއްވި އެއްބާރުލެއްވުމާއި ބެހެއްޓެވި ގާތްކަމަށްޓަކައި އެކަމަނާއަށް ޝުކުރު އަދާކުރެއްވި ކަމަށް ރައީސް އޮފީހުން ވިދާޅުވެއެވެ.
ރައީސް އޮފީހުން ވިދާޅުވީ ދިވެހިރާއްޖެއާއި އެމެރިކާއާ ދެޤައުމުގެ ދެމެދުގައިވާ ގާތް ގުޅުމުގެ މައްޗަށާއި، މިގުޅުން އިތުރު ދާއިރާތަކުގައި ފުޅާކުރެއްވުމާ ބެހޭގޮތުންވެސް މިބައްދަލުކުރެއްވުމުގައި ދެބޭފުޅުން މަޝްވަރާ ކުރެއްވި ކަމަށާއި ވަކިން ޚާއްޞަކޮށް، ތަޢުލީމީ ދާއިރާއާއި، މީހުން ބިނާކުރުމުގެ ދާއިރާގެ އިތުރުން، ބައިނަލްއަޤްވާމީ މަޝްރަހުގައި ދެޤައުމުގެ ޚާރިޖީ ގުޅުން އިތުރަށް ބަދަހިކުރެއްވިދާނެ ގޮތްތަކާ ގުޅޭގޮތުން ވާހަކަފުޅު ދެއްކެވި ކަމަށެވެ. އަދި، ދެޤައުމުގެ ރައްޔިތުންގެ މެދުގައި އޮންނަ ގުޅުން ގުޅުންތައް މިހާރަށްވުރެ ބޮޑަށް ހަރުދަނާ ކުރުމުގެ މުހިންމުކަމުގެ މައްޗަށްވެސް ބައްލަވައިލެއްވި ކަމަށެވެ.
އެ އޮފީހުން އިތުރަށް ވިދާޅުވި އެމެރިކާގެ ސަފީރުގެ ވާހަކަފުޅުގައި، އެމެރިކާއިން ރާއްޖެއަށް ކަނޑައެޅުއްވި ސަފީރުގެ މަޤާމުގައި ހުންނަވައިގެން، ޚިދުމަތް ކުރެއްވުމަކީ، އެކަމަނާއަށް ލިބިވަޑައިގެންނެވި ވަރަށް ބޮޑު ޝަރަފަކާއި ފަޚުރެއްކަމުގައި ވިދާޅުވި ކަމަށާއި އަދި މި ވޭތުވެދިޔަ ދުވަސްތަކުގެ ތެރޭގައި، ރާއްޖެއާއި އެމެރިކާއާ ދެމެދު އޮތް ގުޅުން އިތުރަށް ބަދަހިވެގެން ގޮސްފައިވާ ކަމުގައިވެސް އެކަމަނާ ފާހަގަކުރެއްވި ކަމަށެވެ. އަދި މީގެއިތުރަށް، މިސަރުކާރުގެ ފުރަތަމަ އަހަރުގެ ތެރޭގައި ހޯއްދަވާފައިވާ ބޮޑެތި ކާމިޔާބީތައް ފާހަގަކުރައްވައި، އެކަމަށްޓަކައި ރައީސުލްޖުމްހޫރިއްޔާއަށް ތަހުނިޔާ ވިދާޅުވި ކަމަށްވެސް ރައީސް އޮފީހުން ވިދާޅުވިއެވެ.
