ބޮޑު ޗުއްޓީއާއި ދިމާކޮށް ހައްދުންމަތީ ގަމު ރީޖަނަލް ހޮސްޕިޓަލުން ކުރިއަށް ގެންދާ ހިތާނީ ކޭމްޕް ވަރަށް ކާމިޔާބު ކަމަށް އެ ހޮސްޕިޓަލުން ބުނެފި އެވެ.
ދުވަހަށް މައުލޫމާތު ދެއްވަމުން އެ ހޮސްޕިޓަލްގެ އެޑްމިން އިންޗާޖް ވިދާޅުވީ އެ ހޮސްޕިޓަލުން އިއްޔެ ފެށި ހިތާނީ ކޭމްޕަށް އަތޮޅު ރައްޔިތުންގެ ބޮޑު ތަރުހީބެއް ލިބެމުން އަންނަ ކަމަށާއި މި ކޭމްޕަކީ ވަރަށް ކާމިޔާބު ކޭމްޕެއް ކަމަށެވެ.
”އިއްޔެއިން ފެށިގެން މިމަހުގެ 10 އާއި ހަމައަށް ތިން ބުރަކަށް ބަހާލައިގެން ކޭމްޕް ކުރިއަށް ގެންދަން ނިންމާފައި މިވަނީ ކުރިއަށް އޮތް ތިން ބުރަށްވެސް ބެޑްތައް މިހާރު ހުރީ ފުލްވެފައި، އިތުރަށްވެސް ހުށަހެޅުންތައް އެބަ އާދޭ“ ފަހުދު ވިދާޅުވި އެވެ.
ފަހުދު އިތުރަށް ވިދާޅުވީ ހިތާނީ ކޭމްޕް ކުރިއަށްދަނީ ހިލޭ ބައިވެރިވެވޭ ގޮތަށް ކަމަށާއި މި ހިތާނީ ކޭމްޕްގެ ހުރިހާ ހަރަދެއް ކުރަނީ ހޮސްޕިޓަލުންނާއި ލިބޭ ސްޕޮންސާ ތަކުން ކަމަށެވެ. އަދި މި ކޭމްޕް ކުރިއަށްދަނީ މުނިފޫހިފިލުވުމުގެ ތަފާތު ހަރަކާތްތަކާއި އެކުގައި ކަމަށްވެސް ފަހުދު ވިދާޅުވި އެވެ.
ގަމު ރީޖަނަލް ހޮސްޕިޓަލުން މައުލޫމާތު ދޭ ގޮތުގައި އެ ހޮސްޕިޓަލުން ހިތާނީ ކޭމްޕެއް ބާއްވާ މިއީ ފުރަތަމަ ފަހަރެވެ. މި ކޭމްޕްގައި ހަ އެނދު ބަހައްޓާފައި ވާއިރު މި ކޭމްޕަކީ މުޅި އަތޮޅަށް ހުޅުވާލައިގެން ހިލޭސާބަހަށް ކުރިއަށް ގެންދާ ކޭމްޕެއް ކަމަށް ހޮސްޕިޓަލުން ހާމަކުރެ އެވެ. އަދި މިހާތަނަށް ހިތާނީ ކޭމްޕުގައި އަތޮޅުގެ އެކި ރަށްރަށުން ބައިވެރިވެފައި ވާކަމަށްވެސް އެ ހޮސްޕިޓަލުން ހާމަކުރެ އެވެ.
އެ ހޮސްޕިޓަލުން އިތުރަށް ބުނީ މި ކޭމްޕް ކާމިޔާބު ކަމާއެކު ކުރިއަށްގެންދެވުމުގެ ސިއްރަކީ އެ ހޮސްޕިޓަލްގެ ހީވާގި މުވައްޒަފުންގެ އެކުވެރިކަމާއި އެއްބާރުލުމާއި ހިތްވަރު ކަމަށެވެ. އަދި މި ކޭމްޕުގެ ކާމިޔާބީ އަށް ރިއާޔަތްކޮށް އަންނަ އަހަރު ތ އަދި ލ އަތޮޅަށް އަމާޒުކޮށް ހިތާނީ ކޭމްޕް މިހާރަށްވުރެ ފުރިހަމަކޮށް ކުރިއަށް ގެންދިއުމަށް ވިސްނަމުން އަންނަ ކަމަށްވެސް އެ ހޮސްޕިޓަލުން ހާމަކުރެ އެވެ.
